حقيقه ما حدث فى مسيره واحداث ماسبيرو 9 اكتوبر

قبل اى حاجا عاوز الناس تعرف ان الاعلام بياخد الى عاوزوه من الاحداث وبينقلها بالشكل الى ينفذ بيه رسالته – مفيش اعلام حيادى 100% الا الانترنت

شوفو الصوره دى كويس

متصدقش التلفزيون متصدقش اى اعلام موجه من اى طرف مهما كان ياتنزل تشوف بنفسك ياتسمع من ناس نزلو بالفعل وانا حنقلكم شهاده احد الى نزلو وهو SteveNabeel وهى كالتالي

المسيره بدأت من دوران شبرا .. انا وصلت الساعه 3 و ربع .. و هما كانوا مقررين هيتحركوا الساعه 4 على ماسبيرو

الهتافات كنت بتوتها .. كان فيه منها طائفى من وجهة نظرى .. زى ارفع راسك فوق انت قبطى

بس معظم الهتافات كانت ضد العسكر و ضد المشير .. و كان فيه اعتقاد كبير ان الاحداث ضد الاقباط من تدبير المجلس

و زى ما كتبت .. عمرى ما سمعت العدد ده كله بيهتف ضد العسكر .. العدد فضل يزيد يزيد بشكل مهول .. المهم وصلنا اول شارع شبرا

عند اول شارع شبرا قابلت لبنى و العدد كان وصل ممكن ل 100 الف بدون مبالغه

لما نزلنا نفق شبرا .. كان فيه ناس بتحدف طوب علينا من فوق . المهم تجاهلناهم و هربوا فى الشوارع الجانبيه و كملنا المسيره .. العدد كان زاد اكتر

المهم .. لبنى المصريه المسلمه سحبتنى من قدام ربع نقل كان على وشك انه يدوسنى

وصلنا عند هيلتون رمسيس .. كان فيه نشطاء مستنينا اصلا عند ماسبيرو .. كانوا فاكرين العدد مش هيبقى كبير قوى .. لقوا مسيره 200 الف واحد

فيه ناس مشيت من عند الكورنيش و ناس لفت من ورا رمسيس هيلتون .. اول ما وصلت جنب ماسبيرو .. لقيت الناس بترجع جرى و العساكر جايه علينا

كان فيه صوت رصاص كتير .. معرفش حى ولا مطاطى ولا ايه .. جرينا اخر الشارع و لفيت من عند الكورنيش

و شفت بعينى ..مدرعتين جيش طالعين علينا بسرعه و الناس بتجرى منهم .. واحده منهم دهست اتنين تقريبا راحت الناس اتلمت عليها و ولعوا فيها

المدرعات و هى جايه كانت بتخبط العربيات اللى راكنه و تقلبها كمان

و الناس كانت بتضرب طوب على المدرعه المولعه .. و كل ما يحاول العسكرى اللى فيها يخرج الناس بترميه بالطوب.. قعدنا نهتف سيبوه يخرج

‎

الناس سابته يخرج .. بس اول ما طلع فشخوه ضرب وبعدين لقينا المدرعه التانيه جايه علينا بسرعه جنونيه

المدرعه التانيه دهست قدام عينى مش اقل من 15 واحد .. الناس كانت بتطلع على الرصيف كانت بتطلع وراهم .. دهست مش خبطت

ابتدينا نشيل فى الجثث و ندخلهم فى العمارات و نجرى .. و هرج و مرج

طوب و هرج و مرج .. رجعنا عند منزل الكوبرى قدام هيلتون رمسيس .. و قالبلت تويبس كتير الناس فاكرينهم فرافير و هما بميت راجل .. ولاد و بنات

ابتدينا الكر و الفر مع الجيش .. و هما ابتدوا يضربوا غاز .. غريب فشخ .. مالهوش لون ولا دخان زى القديم .. فجأه تحس بيه و  متعرفش مصدره  غالبا في الوقت ده كان الجيش زاع البيان الوسخ بتاعهفى نص الهرج و المرج مذيعتين امريكان سجلوا معايا .. بيسألونى هو مين اللى بيضرب .. الجيش ولا السلفيين . قلتلهم لا الجيش

و قلت للاتنين الامريكان على فكره احنا مش عايزين تدخل اجنبى ولا حمايه دوليه من حد .. و روحوا دلوقتى عشان باسبوركم مالهوش لازمه لو اتمسكتوا

و بعدين اترمى الغاز .. فجريت تانى على منزل الكوبرى .. و ابتدينا نرمى زلط و هما يرموا علينا زلط و يضربونا بالمطاطى

جريت نحية التحرير علشان اجيب خل .. علشان البيبسى معملش اى حاجه النهارده .. جبته من بقال فى شارع جانبى . رجعت لقيت الوضع اختلف فشخ

لقيت ناس عند تمثال عبد المنعم رياض بيضربوا طوب على ناس برضه تحت الكوبرى .. حاجه شبه موقعة الجمل كده

بقيت اسأل دول اقولهم انتوا بتضربوا مين .. يقولولى دول بلطجية المجلس

لفيت الناحيه التانيه باعجوبه سالت التانين انتوا بتعملوا ايه . قالو بنطهرم البلد من النصاره ولاد الكلب ..

بقيت اقولهم يا جدعان انتوا بتضربوا بنات محجبات .. مفيش حد بيسمع … رجعت تانى ناحية التحرير .. و كر و فر .. و طوب و جرى حبه حلوين كده

و بعدين لقيت فجأه الناس الناحيه التانيه رفعوا ايديهم , و قالوا احنا تبعكوا

و الناس شالوا شيخ سلفى و قعدوا يقولوا مسلم مسيحى ايد واحده .. و المجموعتين انضموا على بعض و العدد كان فشيخ جدا

المهم .. الشيخ السلفى كان بيهتف مسلم مسيحى ايد واحده و الناس تهتف وراه و طالعين على ماسبيرو

و احنا ماشين لقيت واحد بيقول اسلاميه اسلاميه .. رحت ماسكه من قفاه و قلتله .. انت بتشعللها ليه انت مدسوس ولا مخبر .. راح عمل عبيط و سكت

وصلنا عند ماسبيرو باعداد فشيخه .. و العساكر كانوا عاملين كردون ..الهتاف كان يسقط يسقط حكم العسكر .. و فجأه قلب الجيش و الشعب ايد واحده

و لقينا عساكر الجيش بتتطلع على الكوبرى و ترمينا بالظلط .. بعدين لقينا اعداد كبيره من المواطنين الشرفاء معاهم على الكوبرى بيرمونا بالطوب

العساكر طوقونا من الناحيتين .. فهربنا على شارع رمسيس .. كان فيه عساككر و مواطنين شرفاء عند ماسبيرو و عند مدخل التحرير

و المواطنين الشرفاء زادوا فشخ و ابتدوا يهتفوا اسلاميه اسلاميه .. و الشعب يريد تطبيق شرع الله .. و النصارى فين الاسلام اهو

عسكرى بيقول للمواطنين الشرفاء .. ياللا خلونا نطهر البلد من النصارى الانجاس

لما لقينا اننا قليلين فشخ .. و وش هنتمسك .. اتحركنا من شارع رمسيس على وسط البلد .. و فضلنا بس نكلم بعض و نطمن .. و نتلم

خرمنا من وسط البلد على التحرير .. لقينا العساكر سادين الشارع .. حاولنا نهتف ضدهم .. بس كنا قليلين ,, و واحد فيهم ضرب برشاش الى فى الهوا

قعدنا نسقفله و نقوله .. دكر .. و راجل

و بعدين سمعنا انهم ابتدوا يقبضوا على ناس .. ف استخبينا فى مكان مش هقول عليه .. و عرفنا انهم هيطبقوا حظر التجوال

استنينا شويه و بعدين سيبنا المخبا.مشينا فى شوارع جانبيه لحد رمسيس..و هناك لقينا مسيره بتهتف ضد العسكر بس صغيره قوى . انا كنت تعبان فشخ فروحت

دى كانت شهادتى .. عايز تصدق صدق .. مش عايز متصدقش

 

ستيف نبيل .. فى 9 اكتوبر 2011