انا والعجز وفقدان الحركة

الناس كلها عارفا انى عملت حادثة لكن متعرفش اية الى حصل او بمعنى اصح عندها الموضوع امر عادى بس بما انى بخرف وعمال اكتب اى هبل فمن حقى احكى وافضفض فى الموقع الى عملتو ومقلتوش لحد 😀 عن الى حصل

بالتحديد يوم 12 – 8 -2005 بعد نتيجة الجامعة ب 4 ايام والفرحة الى مكنتش تتوصف بمعجزة النجاح لانى مش كنت حضرت وكان نسبة حضورى 4% بسبب اهتمامى بالشغل عن الجامعة

اهلى كانو سافرو يوم 11 -8 -2005 عشان فرح ابن خالتى ويوم 12 – 8 صباحا كان عندى اجتماع مع الشيخ عوض الغرابى رئيس مجلس ادارة شركة الانذار المبكر فى السعودية ومحمد نصير صاحب مجموعة الكان فى الدقى والى ماسك فودافون كلها المهم بعد ما خلصت كان الحوار التالى فى التليفون بينى وبين ماما

ماما :ايمن لازم تيجى فرح ابن خالك .
انا : والله ياماما مينفعش عندى شغل
ماما : والله العظيم لنت جى مينفعش تقعد لواحدك فى الشقة فى الحقيقة ماما مكنتش بتثق فى حضرتى لاخلافى العظيمة !!! :D> .
انا : والله ما ينفع يماما طيب ححاول
وقفلت السماعة وروحت البيت وكان مفيش فى القاهرة وقتها الا انا واحمد اخويا وطبعا مكنش فى اكل بحكم اننا فاشلين فى اننا نعمل اكل نزلت جبت شيبسى عائلى وسفن اب كبيرة وجبت مدليتين من عند محل هدايا من الى هما طوال المهم فكلمت ماما من المحل اطمن عليهم واقولها خلاص اننا مسافرين ودار الحوار التالى

انا : ازيك يماما عاملة اية خلاص حنيجى انا واحمد دلوقتى
ماما : حازم جى اسكندرية تعالو معاة بدل ما تيجو موصلات

بالمناسبة حازم دة زوج اختى وكانو مخلفين قبل الحادثة بايام بنت اختى جنى وكان المفروض اختى وبنتها هما الى يسافرو مع حازم زوج اختى ظابط فى امن الدولة بعيد عنكم وقتها كان فى الامن المركزى قطاع 6 اكتوبر بس لحسن الحظ اختى وبنتها سافرو مع ماما ومن مفارقات الزمن انى الى صورت سبوع بنت اختى ووجهتلها كلمة فى الكاميرا ححاول ابقا اجيبلكم فيديو السبوع سبحان الله زى ما بكون سايب اخر ذكرى فى حياتى

بعد ما قفلت كلمت زوج اختى واتفقت معاة ونزلت انا واخويا ورحنا لغاية القطاع فى 6 اكتوبر وكانت اول مرة اروح القطاع وركبت معاه العربية وشغل سورة يوسف من القران الكريم وانا واحمد بحكم اننا بنحب التصاميم قعدنا نعلق على الاعلانات فى الطريق الصحراوى وكنت عطشان جدا فقلت لزوج اختى يصحينى عند الريست اشرب ميا !! وانا بعلق على الاعلانات عينى غفلت انا واحمد اخويا لدقائق

وكان التالى لحظة فارقة فى حياتى

صحيت على نفسى وانا بخبط لمين وشمال والعربية بتتهز جامد لفت 5 لفات ونزلت تحت التريلا الى خبطتنا والله يسامح سائقها ويغفر لة حتى لو غلطان على الى حصلى المهم جوز اختى نزل وانصدم على العربية وكلم ماما وقعد يقول العربية راحت !!! وطلعو اخويا كان فاقد الوعى ومش حاسس بالدنيا وانا كنت جوة والناس بتقولى اطلع والتالى اصعب لحظات حياتى

بعد ما كنت فى لا وعى وصدى صوت حادثة وعمال اسئل نفسى حادثة اية حادثة عملنا حادثة جيت اقوم عشان اخرج اكتشف ولاصعب لحظة فى حياتى انى فاقد القدرة على حركة رجلى تماما “ناديت لحازم بصوت عالى حازم انا انشليت” 🙁 محدش سمعنى ولا جمع الكلام ولقيتو بيقول لماما ايمن كويس واحمد الى تعبان !!! بس عرف بعد كدة الحقيقة دخل العربية وربط جرح راسى لان دماغى كانت مفتوحة 3 سم ونفوخى برة وطلع يشوف احمد ودخل الناس ينقلونى لقيت ساعتى فى ايد واحد قلتلو ماسك الساعة لية هاتها جيت امسك بايدى لقيت ايدى الاتنين عاجزين عن الحركة وعن انى افتح او اقفل صوابعى ناديت حازم ياخد الساعة والناس دخلت العربية تشيلنى وشالونى زى الجثة وانا كنت فى مرحلة الا وعى وبين الحيا والموت ونفسى كان صعب جدا اخدة والناس ممسكتش رقبتى الى للاسف كانت اتكسرت وحطونى فى الحارة فى النص فى الطريق الصحراوى قلت بالعافية نفسى نفسى حاولو يلفونى اخد نفسى جسمى لف ورقبتى فضلت زى ما هيا الفقرات انكسرت تماما عن العمود الفقرى

المهم جت الاسعاف عشان تاخدنا وانا فاكر واى لما كنت بحاول اوصى اخويا على ماما وعلى واحد من اعز صحابى اسمو مينا من مودرن هو وبعدين الاسعارف طلع مفهاش بنزين واستنينا اسعاف تانيا ورحت المستشفى العاجلة فى الصحراوى فى مدينة اسمها السادات كانت مستشفى رائعة مفهاش اى حاجا تقريبا حتى البيتادين المطهر مفهاش !!! خيطلى راسى ومن غير بنج لان مينفعش وهما مش عارفين اية الى حصل فى المخ يحطو بنج وعملو اكتر من اشعة واتنقلت لمستشفى المعادى للقوات المسلجة وفضيت يومين من ايام جهنم فى العناية المركزة بجد بين تفكير فى المستقبل المجهول والماضى والحب والى بحبها والى خلاص مش حنبقا لبعض بسبب انى بقيت عاجز وكلام كتير والاصعب كان عليا ماما لما شافتنى وعرفت انى مشلول الناس كلها مكنتش مصدقة جيت يوم السبت جة دكتور المخ والاعصاب المعروف اللواء دكتور محمد توفيق وقال لازم يعمل عملية فورا واتجهزت للعملية ومن ظلم الزمن اكتر ان اكتشفو ان فى تيفود فى الدم وكان لازم اتعالج منة لان الحرارة العالية غلط عليا والتيفود دة يجماعة بجد صعب اوى وجعة فظيع المهم اتأجلت العملية وكل شويا تتاجل لغاية ما عدى شهر والمفروض خطر انى استنى اكتر من يومين معملش العملية كنت نايم على سرير متبث فية مش شايف الا السقف قدامى وكان غلط عليا انى احط حتى مخدة تحت راسى فضلت فى مصر 3 شهور اتعالج بعد العملية واصلا دخولى العملية كان فية خطر 70% لانى كنت داخل وحرارتى 40 وبالتيفود الى اكتشفنا بعد العملية ان الحرارة كانت بسبب الكسر مش التيفود الى اصلا جالى بسبب الانعاش !!!

سافرت اتعالجت برة ورجعت بشلل نصفى وضعف فى الايد اليمنى وبعد كدة الى ضعف فى الحركة وقدرة بسيطة على المشى بال مشاية الحمد لله لغاية النهاردة بعمل علاج طبيعى بس بعانى اوى من الوحدة كل صحابى نسيونى كل الناس مش حوليا حتى اهلى نادر لما بيسئلو عنى عادى الزمن طبيعى غدار بداوى جروحى بذاكرتى وكل يوم بشوف فية بنت اختى بتكتبر بفرح اكتر لان عمرها من عمر الحادثة وان انا الى كنت مكانها ودة بامانة الى مخلينى راضى انى فديت بنت اختى “جنى Jana “بس لازم اشكر كل  الى وقفو جمبى وطارق صاحبى فى الجامعة الى بردو شايلنى رغم انو مش مرغم بدة

وكل صحابى الى قربو منى فى الجامعة ومى وشيماء الى بجد من اطيببببببببببببببب الناس الى عرفتهم فى حياتى وامنية وهانم وعثمان وجيمى وطارق ومرسى وكل جروب الجامعة
فى النهاية يارب محدش فيكم يشوف حاجا وحشة فى حياتو يارب

31تعليق من اصدقائي

  • reham salah

    الخميس 31 مارس 2011 الساعه 02:26:38 صباحًا

    you are graet person and am sure insallah you will be like befor and better insahllah. never loss hope

  • emmyehab

    الثلاثاء 12 أبريل 2011 الساعه 07:33:05 مساءً

    انت بجد راجل عظيييييم وان شاء الله هتتحسن وربنا هيشفيك عشان جواك راضي وانت مؤمن واكيد ان شاء الله باذن الله هتمشي وترجع زي الاول واحسن

  • Eman Abdalhalim

    الأربعاء 4 مايو 2011 الساعه 11:38:10 صباحًا

    :(((((( انا اقدر اساعدك لو احتاجت اي حاجه

    • م / ايمن العريان

      الأربعاء 4 مايو 2011 الساعه 11:39:33 صباحًا

      ربنا يخليكى يا ايمان لا اطمنى 😀 سبع الليل (مش سباعى)

  • Amani dewidar

    الأربعاء 4 مايو 2011 الساعه 12:06:25 مساءً

    أيمن ,
    انا مش اعرفك كويس ,لكن انت حد خدووم جدا ,ومن كلامك باين انك راضى من جواك الحمد لله,اصبر على الابتلاء وربنا كرييييم جدا
    واحنا كلنا معاك اهوا 🙁

    • م / ايمن العريان

      الأربعاء 4 مايو 2011 الساعه 12:07:48 مساءً

      هو البلوج قلبت على عبد الحليم حافظ كدا ليه ههههههههههه يجماعه عااااااااادى عادى هو محدش بيمرض :d كلنا بيجلنا صداع دا صداع بس تقيل حبتين هههههههههههههههههه

  • Shaimaa Mohammed

    الأربعاء 4 مايو 2011 الساعه 12:28:20 مساءً

    ربنا يشفيك ياااااااارب وترجع احسن من الاول انت انسان رائع وراضي بقدر الله وربنا قال من رضي بقدري اعطيته على قدري قول دايما الحمد لله وربنا يكرمك ويعوضك خير ان شاء الله

  • Eslam Elgindy

    الأربعاء 4 مايو 2011 الساعه 07:16:45 مساءً

    الف سلامه عليك انا مقدر احساسك لانى مريت بما شابه من حادث وفقدانى الحركه لفتره لكن الحمد لله عدت على خير زى ما بأذن الله هتعدى على خير ونشوفك احسن منى كمان لا يصيبنا الا ما كتبه الله لنا ده اختبار من ربنا وهيعدى علي خير زي ما نجحت في اختبارات الجامعه سلامى لجنى

    • م / ايمن العريان

      الأربعاء 4 مايو 2011 الساعه 11:42:26 مساءً

      ربنا يخليك يا اسلام يارب وشرفنى مرورك

  • shaimaa mohammed

    الخميس 5 مايو 2011 الساعه 02:17:53 مساءً

    الف سلامه عليك وربنا يشفيك يارب وترجع احسن من الاول وده ابتلاء وامتحان من ربنا وانت ان شاء الله هتعديه وبجداره وطول مانت بتطلب من ربنا سبحانه وتعاله تاكد انه مش هيخزلك
    وان شاء الله موضوعك القادم تبشرنا باتمامك شفاؤك
    وربنا يزيدك صبر ورضاء يارب

  • mostafa

    السبت 14 مايو 2011 الساعه 05:25:53 مساءً

    ربنا يوفقك يا بطل

    ما يقع الا الشاطر و علي فطرة انا عندي 15 سنة و بتعلم برمجة عشان ابقي زيك 😀

  • mostafa

    السبت 14 مايو 2011 الساعه 05:26:41 مساءً

    قصدي علي فكرة

  • محمد مصطفى أبوالوفا

    الجمعة 27 مايو 2011 الساعه 01:33:05 مساءً

    والله يا هندسة أنت خلتنى أبلم (شدة على اللام) من طريقتك الجميلة وتقبلك للواقع االى حصل , وطبعا دمى بيغلى من أم الغباء والجهل اللى مالى البلد اللى بيحسسنى إن البلد دى عايزة ألفين سنة عشان نفهم إن الفهلوة وارفع يا عم معاى وشيل من هنا يا عم الحاج مش بتساعد واحد مصاب فى حادثة.. على العكس لو في حد بيفهم كان سابك لحد لما ييجى متخصص يطلعك من العربية كان ممكن يبقى الوضع أفضل بس ده قدر الله وأنا مؤمن جدا إن اللى حصل ده أكيد فيه خير ليك وأتمنى إنك ترجع أحسن من الأول و يا رب فى أسرع وقت ممكن.
    تشرفت بمعرفة شخصية مثلك ومتابع لنشاطاتك على تويتر .. وإلى الأمام دائما

  • soma

    الأربعاء 22 يونيو 2011 الساعه 03:59:34 صباحًا

    كل ال ربنا كا تبهلنا لازم يحصل بس المهم اننا نرضى ونقول الحمد الله وبازن الله ربنا هيكمل شفائك ع خير وتقوم وتمشى احسن من الاول وربنا رحمته واسعه وانت انسان كويس يا ايمن ومحترم جدااااا بس معلش لازم يكون ف امل ف بكره وف ربنا

  • مى سمير

    الأحد 24 يوليو 2011 الساعه 11:56:09 صباحًا

    الف سلامه عليك وربنا يتم شيفاك على خير يارب انت انسان بجد كويس ربنا يكرمك يارب ومايورى حد اللى انت شفته ده وربنا يجلعه في ميزان حسناتك

  • فطوم

    الخميس 1 سبتمبر 2011 الساعه 10:31:09 صباحًا

    الف مليون سلامه يا ايمونه . يا صديقى العزيز واللى جاى احسن ان شاء الله.

  • Hakeem

    السبت 17 سبتمبر 2011 الساعه 08:48:34 صباحًا

    ايمن انتا انسان عزيز وغالي علينا جميعا …
    الله يشافيك ويعافيك بحق جاه محمد واله.

    صدقني ياأيمن ده اللي حصل ليك انما هو اختبار من الله سبحانه،، وكل ماصبرت وشكرت الله كان الجزاء والثواب اكثر واعظم في الاخرة.

    اطال الله في عمرك.. ولاأراك مكروه بعد اليوم.

  • A M R عَمْرو

    الجمعة 14 أكتوبر 2011 الساعه 09:11:21 مساءً

    أنا زيك يارفيق متزعلش .. اللي حصلي ده قواني ..

    وركز على العلاج الوظيفي عشان تعرف تخدم نفسك .. ده لوحده هيحسن من نفسيتك

    ربنا معاك ياباشمهندش، على فكرة شغلك رائع برضه خصوصاً بتاع لا للمحاكمات العسكرية :))

  • t7rermasr

    السبت 24 ديسمبر 2011 الساعه 06:35:03 صباحًا

    الاخ ايمن
    من الواضح انك انسان نبيل ومؤمن ارجو تقبل قدرك من الله عز وجل لانها اراده الله وتاكد ان صبرك على ما اصابك علامة تفرح بيها لانها هدية الله والعطاء على الصبر هتنوله فى اخرتك لا تقلق .انا من الصورة اللى حكيتها حسيت انك داخلك انسان ونبيل كمان والله حبيتك يا اخ ايمن من غير ما اشوفك ولا اتعامل معاك شئ فى الله انسانيتك وشفافيتك زارعة جواك ايمان تعامل بيهم فى الحياة وتاكد المكاسب هتزيد واعتبر كلام اخوك الغير مقصود والاجو انت تكون عند هذه الكلمة الغير مقصود فاهم ده ابن ابوم دم ولحم ولكن البنى ادمين قدرات ومن الجائز قدراته لم تحتمل او قوته موش كفاية فالمس له العزر ولكن قلبك الكبير هو اللى هيعينك على المسير تعامل مع الحياة بهذا الشكل وتاكد عوض الله ليس له حدود تمسك بالله والله المستعان انا معك بقلبى ومشاعرى ومن وقت لاخر هزوبك بالمدونه الجميلة دى يا عبقرى.الله الموفق

  • m7md ism3el

    الأحد 25 ديسمبر 2011 الساعه 04:26:10 صباحًا

    ربنا يقويك يا رب والحمد لله على كل شى وعلى فكره انا بنت اختى اسمها جنا ربنا يباركلنا فيهم يا رب

  • مجدي

    الإثنين 13 فبراير 2012 الساعه 08:45:00 صباحًا

    أيمن،
    السلام عليكم،
    أنا دخلت على موقعك من موقع توثيق الشهداء ومن الموقع على المدونة وقريت المدونة دي.
    انا شغال مهندس برمجيات زيك ولفت نظري مستوى الشغل بتاعك وقلت انا عاوز أعرف مين ده.
    مش عارف أقولك ايه … اصبر فان الله لا يضيع أجر الصابرين ، وحافظ على روحك الجميلة دي وربنا فرجه واسع ، انتا ألهمتني جدا ، أنا أصلا مفصل رجلي الشمال متدمر تقريبا وزعلان جدا اني كده ، لما قريت التدوينة وشفت صبرك ما شاء الله قلت سبحان الله انا أنا عيل خربء صحيح.
    أنا عاوز نفضل على تواصل لأني بعمل مشروع مشابه لمشروعك ويمكن أحتاج مساعدتك اذا سمحت ، احنا متشابهين على أي حال 🙂
    بالتوفيق يا جميل 🙂

  • amr smsm

    الخميس 16 فبراير 2012 الساعه 03:01:21 صباحًا

    ربنا يقويك الحمد لله انك بخير و ألف سلامة و أنا ما اعرفكش على فكرة 🙂

  • Nourhan Ashraf

    الثلاثاء 27 مارس 2012 الساعه 04:24:49 صباحًا

    اذا رايت الله يحبس عنك الدنيا ويكثر عليك الشدائد فاعلم انك عزيز عنده وانك عنده بمكانه .. اما سمعت قوله ( وَاصْبِرْ لِحُكْمِ رَبِّكَ فَإِنَّكَ بِأَعْيُنِنَا )

  • فاطمة الفرج

    الجمعة 30 مارس 2012 الساعه 02:18:11 صباحًا

    ربنا بيحبك يا ايمن, ان الله اذا احب عبدا ابتلاه, وهو فعلا بيحبك, لانك صبور, والله يحب الصابرين ولانك جعلت من الصخرة التي سدت طريقك عتبة ارتفعت عليها (وارتفاعك هو دليل النجاح في الابتلاء), ولانك مؤمن بقضاءه وقدره(وعسى ان تكرهو شيئا وهو خير لكم), ولانك سامحت انسان كان ربما اخطأ خطأ بسيط نتج عنه معاناة (والكاظمين الغيظ والعافين عن الناس والله يحب المحسنين)
    كلنا نعاني في الحياة سواء علناً او في الخفاء ولكن مش كلنا بنتعامل مع الاقدار بالصبر او الرضا ناهيك عن الشكر… الحمد لله على كل حال
    “ولنبلونكم ايكم احسن عملا”
    ” ويوفى الصابرين اجرهم ‘بغير حساب’ ”

    كلما تحس الدنيا اسودت في وجهك , واذكر الله وكلمه هو اكثر واحد بيسمعك وبيرد عليك مش بالكلام بالمواقف, واطلب منه (ما تشاء) ولن يردك تاكد
    تذكر ان مع العسر يسرا…*لم يقل ان بعد العسر يسرا!

  • mohamed

    الأحد 24 فبراير 2013 الساعه 08:32:08 مساءً

    ركز على العلاج يا غالي

  • هدير يوسف

    الخميس 25 أبريل 2013 الساعه 12:38:49 صباحًا

    انا مش عارفة ااقولك ايه بجد … غير ان الدنيا دار بلاء والانسان فيها مبتلي … المهم فيها اللي يرضي بقضاء ربنا ويصبر وبالصبر هتنول كل حاجة … الصبر مر بس أخرة شهد … بدعيلك ان ربنا يقويك والحمدلله انها جت علي كده وله في ذلك حكم محدش عارف كان ممكن يحصل ايه … وربنا يزيدك ايمان ورضا بقضاءة وحكمتة … ويزيدك من علمه وميحرمكش من خيرة … وبردو انا فخوووووورة جدا جدااا جدااااا بيك ياباش مهندس 🙂

  • مروه

    الثلاثاء 2 يوليو 2013 الساعه 03:01:03 مساءً

    انا فخوره بصداقنك واصرارك وايمانك الله يثبتك ويرزقك الجنه ويعوضك خير

  • Pingback: رسالة رقم ١ الى أبنى القادم باذن الله – يوسف – تعلم الصبر ! | مدونة زبادى خلاط ! Ayman Blog

  • Noha

    السبت 25 أكتوبر 2014 الساعه 03:07:17 صباحًا

    من اخر الرجال المحترمين ربنا يكمل شفاك ع خير ويبارك لك فيما رزقت

اترك رد - رأيك يهمنى :)

%d مدونون معجبون بهذه:
© 2012 مدونه زبادى خلاط. مفيش اى حقوق محفوظه.