-
ذكريات عن الحادثة
الناس كلها عارفا انى عملت حادثة لكن متعرفش اية الى حصل او بمعنى اصح عندها الموضوع امر عادى بس بما انى بخرف وعمال اكتب اى هبل فمن حقى احكى وافضفض فى الموقع الى عملتو ومقلتوش لحد 😀 عن الى حصل
بالتحديد يوم 12 – 8 -2005 بعد نتيجة الجامعة ب 4 ايام والفرحة الى مكنتش تتوصف بمعجزة النجاح لانى مش كنت حضرت وكان نسبة حضورى 4% بسبب اهتمامى بالشغل عن الجامعة
اهلى كانو سافرو يوم 11 -8 -2005 عشان فرح ابن خالتى ويوم 12 – 8 صباحا كان عندى اجتماع مع الشيخ عوض الغرابى رئيس مجلس ادارة شركة الانذار المبكر فى السعودية ومحمد نصير صاحب مجموعة الكان فى الدقى والى ماسك فودافون كلها المهم بعد ما خلصت كان الحوار التالى فى التليفون بينى وبين ماما
ماما :ايمن لازم تيجى فرح ابن خالك .
انا : والله ياماما مينفعش عندى شغل
ماما : والله العظيم لنت جى مينفعش تقعد لواحدك فى الشقة فى الحقيقة ماما مكنتش بتثق فى حضرتى لاخلافى العظيمة !!! :D> .
انا : والله ما ينفع يماما طيب ححاول
وقفلت السماعة وروحت البيت وكان مفيش فى القاهرة وقتها الا انا واحمد اخويا وطبعا مكنش فى اكل بحكم اننا فاشلين فى اننا نعمل اكل نزلت جبت شيبسى عائلى وسفن اب كبيرة وجبت مدليتين من عند محل هدايا من الى هما طوال المهم فكلمت ماما من المحل اطمن عليهم واقولها خلاص اننا مسافرين ودار الحوار التالىانا : ازيك يماما عاملة اية خلاص حنيجى انا واحمد دلوقتى
ماما : حازم جى اسكندرية تعالو معاة بدل ما تيجو موصلات
blockquote>بالمناسبة حازم دة زوج اختى وكانو مخلفين قبل الحادثة بايام بنت اختى جنى وكان المفروض اختى وبنتها هما الى يسافرو مع حازم زوج اختى ظابط فى امن الدولة بعيد عنكم وقتها كان فى الامن المركزى قطاع 6 اكتوبر بس لحسن الحظ اختى وبنتها سافرو مع ماما وspan style=”color: #ff0000;”>من مفارقات الزمن انى الى صورت سبوع بنت اختى ووجهتلها كلمة فى الكاميرا ححاول ابقا اجيبلكم فيديو السبوع سبحان الله زى ما بكون سايب اخر ذكرى فى حياتى
/span>/blockquote>
بعد ما قفلت كلمت زوج اختى واتفقت معاة ونزلت انا واخويا ورحنا لغاية القطاع فى 6 اكتوبر وكانت اول مرة اروح القطاع وركبت معاه العربية وشغل سورة يوسف من القران الكريم وانا واحمد بحكم اننا بنحب التصاميم قعدنا نعلق على الاعلانات فى الطريق الصحراوى وكنت عطشان جدا فقلت لزوج اختى يصحينى عند الريست اشرب ميا !! وانا بعلق على الاعلانات عينى غفلت انا واحمد اخويا لدقائقوكان التالى لحظة فارقة فى حياتى
صحيت على نفسى وانا بخبط لمين وشمال والعربية بتتهز جامد لفت 5 لفات ونزلت تحت التريلا الى خبطتنا والله يسامح سائقها ويغفر لة حتى لو غلطان على الى حصلى المهم جوز اختى نزل وانصدم على العربية وكلم ماما وقعد يقول العربية راحت !!! وطلعو اخويا كان فاقد الوعى ومش حاسس بالدنيا وانا كنت جوة والناس بتقولى اطلع والتالى اصعب لحظات حياتى
بعد ما كنت فى لا وعى وصدى صوت حادثة وعمال اسئل نفسى حادثة اية حادثة عملنا حادثة جيت اقوم عشان اخرج اكتشف ولاصعب لحظة فى حياتى انى فاقد القدرة على حركة رجلى تماما “ناديت لحازم بصوت عالى حازم انا انشليت” 🙁 محدش سمعنى ولا جمع الكلام ولقيتو بيقول لماما ايمن كويس واحمد الى تعبان !!! بس عرف بعد كدة الحقيقة دخل العربية وربط جرح راسى لان دماغى كانت مفتوحة 3 سم ونفوخى برة وطلع يشوف احمد ودخل الناس ينقلونى لقيت ساعتى فى ايد واحد قلتلو ماسك الساعة لية هاتها جيت امسك بايدى لقيت ايدى الاتنين عاجزين عن الحركة وعن انى افتح او اقفل صوابعى ناديت حازم ياخد الساعة والناس دخلت العربية تشيلنى وشالونى زى الجثة وانا كنت فى مرحلة الا وعى وبين الحيا والموت ونفسى كان صعب جدا اخدة والناس ممسكتش رقبتى الى للاسف كانت اتكسرت وحطونى فى الحارة فى النص فى الطريق الصحراوى قلت بالعافية نفسى نفسى حاولو يلفونى اخد نفسى جسمى لف ورقبتى فضلت زى ما هيا الفقرات انكسرت تماما عن العمود الفقرى
المهم جت الاسعاف عشان تاخدنا وانا فاكر واى لما كنت بحاول اوصى اخويا على ماما وعلى واحد من اعز صحابى اسمو مينا من مودرن هو وبعدين الاسعارف طلع مفهاش بنزين واستنينا اسعاف تانيا ورحت المستشفى العاجلة فى الصحراوى فى مدينة اسمها السادات كانت مستشفى رائعة مفهاش اى حاجا تقريبا حتى البيتادين المطهر مفهاش !!! خيطلى راسى ومن غير بنج لان مينفعش وهما مش عارفين اية الى حصل فى المخ يحطو بنج وعملو اكتر من اشعة واتنقلت لمستشفى المعادى للقوات المسلجة وفضيت يومين من ايام جهنم فى العناية المركزة بجد بين تفكير فى المستقبل المجهول والماضى والحب والى بحبها والى خلاص مش حنبقا لبعض بسبب انى بقيت عاجز وكلام كتير والاصعب كان عليا ماما لما شافتنى وعرفت انى مشلول الناس كلها مكنتش مصدقة جيت يوم السبت جة دكتور المخ والاعصاب المعروف اللواء دكتور محمد توفيق وقال لازم يعمل عملية فورا واتجهزت للعملية ومن ظلم الزمن اكتر ان اكتشفو ان فى تيفود فى الدم وكان لازم اتعالج منة لان الحرارة العالية غلط عليا والتيفود دة يجماعة بجد صعب اوى وجعة فظيع المهم اتأجلت العملية وكل شويا تتاجل لغاية ما عدى شهر والمفروض خطر انى استنى اكتر من يومين معملش العملية كنت نايم على سرير متبث فية مش شايف الا السقف قدامى وكان غلط عليا انى احط حتى مخدة تحت راسى فضلت فى مصر 3 شهور اتعالج بعد العملية واصلا دخولى العملية كان فية خطر 70% لانى كنت داخل وحرارتى 40 وبالتيفود الى اكتشفنا بعد العملية ان الحرارة كانت بسبب الكسر مش التيفود الى اصلا جالى بسبب الانعاش !!!
سافرت اتعالجت برة ورجعت بشلل نصفى وضعف فى الايد اليمنى وبعد كدة الى ضعف فى الحركة وقدرة بسيطة على المشى بال مشاية الحمد لله لغاية النهاردة بعمل علاج طبيعى بس بعانى اوى من الوحدة كل صحابى نسيونى كل الناس مش حوليا حتى اهلى نادر لما بيسئلو عنى عادى الزمن طبيعى غدار بداوى جروحى بذاكرتى وكل يوم بشوف فية بنت اختى بتكتبر بفرح اكتر لان عمرها من عمر الحادثة وان انا الى كنت مكانها ودة بامانة الى مخلينى راضى انى فديت بنت اختى “جنى Jana ” بس الحمل ذاد عليا اوى والى بيخدمونى خلاص مبقوش يستحملونى وكل يوم بسمع كلمة بتجرحنى اوى من اقرب الناس ليا حتى اخويا الى من لحمى بس بجد لازم اشكرة من قلبى رغم كل كلامو الى بجد بيقتلنى ولا هو حاسس لازم اشكرو وكل الى وقفو جمبى وطارق صاحبى فى الجامعة الى بردو شايلنى رغم انو مش مرغم بدة
وكل صحابى الى قربو منى فى الجامعة ومى وشيماء الى بجد من اطيببببببببببببببب الناس الى عرفتهم فى حياتى وامنية وهانم وعثمان وجيمى وطارق ومرسى وكل جروب الجامعة
فى النهاية يارب محدش فيكم يشوف حاجا وحشة فى حياتو يارب
7تعليق من اصدقائي
-
-
ahmad
الأربعاء 7 مايو 2008 الساعه 09:48:41 مساءًحقيقة يا أيمن أنا أول مرة أعرف قصتك زين، هذي هي الدنيا يا أيمن وكل الي ممكن نقوله لك الله يجبر لك مصيبتك ويخلف لك خير منها…
تأكد ان الانسان بالدنيا بين النعيم والشقاء…والمؤمن يبتلى وأكثر المؤمنين بلاء الأنبياء ثم الصحابة ثم من تبعهم من التقوى…
بشرى لك بان ما اصابك ان شاء الله انه ابتلاء من الله عز وجل لانه احبك…فافرح كثييييراً بهذه المصيبة ولا تحزن…فالله بعوضك بأحسن منها بجنة عرضها كعرض السماوات والارض…وقصر كبييير بالجنة والكثير من النعم والحور العين تختار ما تشاء وبترجع بشبابك واجمل وبقوة وأكثر…بس عليك تصبر وتكون راضي تماماً بقضاء الله وقدرة…ويكون هذا الحادث لك سبب قوي لتقوية علاقتك بالله وترك المعاصي والتقرب لله اكثر والعمل الصالح اكثر…واهم شي الصلاة الصلااااااة يا ايمن لا تتركها…
ويقول المثل اذا رأيت مصيبة غيرك تهون مصيبتك…لذلك احمد الله على نعمته وانها جت على كذا…اكيد بفترة جلوسك بالمستشفى وبقسم الجراحة شفت ناس حصلها اكثر من الي حصلك وبتتعذب…فالحمدلله على كل حال…
فاكر قصة الصحابي الي خبروه بأن أفضل واحب ولد له مات …ثم خبروه بان ولده الاخر ايضاً مات…
وفاكر قصة الحسين كيف قتلوه وقتلوا قبله ابنه وجلس يبكي عليه…الانسان يقول الحمدلله وياربي ارضى عني وعوضني بافضل من حالي…
وكمان شوف الجانب الايجابي لمصيبتك…انت الان ما شاء الله تبارك الله مبرمج متمكن وخبرة كبيرة وجيدة…قبل الحادث هل كان عندك الوقت لتكون مبرمج متمكن؟
الحادث ممكن وفر لك الوقت…وبكذا اكتشفت ونميت مواهب لك كانت مدفونة..انا مريت بوضع قريب من وضعك وجلست 4 اشهر بالمستشفى ما اتحرك سااادح على طول…ولما طلعت فعلاً الاقرباء واصدقائي تخلوا عني وسرت وحيد…سرت اخاف اجلسي بعزيمة او اي حفلة تسير اعتزل نفسي بغرفة…تعطلت عن الدراسة شهوووور…لكن بعدين اكشتفت موهبتي وطورت نفسي على الكمبيوتر وشوي شوي الحمدلله عرفت ان الي حصلي كان خير لي مش شر علي…وانت اكيد عارفني وعارف مين انا الحين 🙂
ماتدري الي يصيب الانسان ممكن يكون خير له مش شر…تحسبوه شراً لكم وهو خيراً لكم…
وبالنسبة للعروسة…ثق ثقة تامة ان الله هو الرازق حتى الي بوضعك الحالي…اصدق النية مع الله وابذل الاسباب ولو باقل الامكانيات الي عندك ولو عبر الانترنت وانت فاهم قصدي وربي بوفقك باذن الله تعالى بس ابذل الاسباب لا تنتظر احد يساعدك بهذا الموضوع وعليك بالدعاء واخلاص النية…
بتحصل بنت الحلال الي تشوف قلبك قبل جسمك وحركتك…الله يشفيك ويعافيك ويعطيك ويرزقك ويصلح أمرك ويصلحك…ويعوضك بالجنة والحياة قصيرة والجنة حياة أبدية..
أخوك فالله/ أحمد…
-
Ahmed Tohamy
الثلاثاء 27 مايو 2008 الساعه 11:49:02 مساءًانا اول مره ادخل مدونتك .. بأمانه التدوينه دي مؤلمه جداً .. ربنا يكون في عونك واعرف ان ربنا بيبتليك بالحادثه دي عشان يختبر صبرك وإن شاء الله يغفرلك بها ذنوب تانيه .. وموضوع النسيان والكلام الجارح فكر في حلو الناس دي وهي دي الدنيا بيفتكروك مع حضورك وممكن يكونوا فاكرينك بس مشاغل الدنيا ومش قادرين يكلموك ..
مش هقولك غير .. ربنا يصبرك ويشفيك . -
A.M.K
الثلاثاء 19 يناير 2010 الساعه 02:00:10 صباحًامدونة مؤلمة مستر ايمن بس خلى ثقتك بالله قوية وهيا اللى هتعينك على المكروه اللى اصابك
وأوعى تقول انا الى كنت مكانها ودة بامانة الى مخلينى راضى انى فديت بنت اختى “جنى Jana ”
لان هذه ترتيبات المولى عز وجل ربنا هو اللى فداها مش انت وبعدين ده قدرك تكون تكفير لذنوبك فى الدنيا احسن ما تكون فى الاخرة احمد ربنا
وفى النهاية احب اقولك ربنا معاك كون واثقا فى الله -
A.M.K
الثلاثاء 19 يناير 2010 الساعه 02:00:38 صباحًاانا عمرو مجدى العريان يا ولد يا ايمن
-
هبة النيل
الأربعاء 27 أبريل 2011 الساعه 08:26:42 مساءًايمن انت اقوى انسان شوفته في حياتي وانجح انسان قابلته … يمكن عرفتك بعد فترة طويلة من الي حصل بس بجد انا عمري ما شوفت اصرار زي الي عندك وايمان وحب للحياة … ربنا يزيدك من الصبر والقوة والنجاح ” ويارب ابقى في يوم من الايام زيك في نجاحك وإبداعك وقوتك ” وانت ان شاء الله هاتبقى انجح وانجح من كل يوم يعدي عليك
بجد انت علمتني كتير ولسه بتعلم منك وبشكر ربنا انه انعم عليا بصديق وفي و مخلص زيك 🙂
يالا كفايه كده عشان متتغرش 🙂 -
MIDO
الأربعاء 9 نوفمبر 2011 الساعه 09:43:22 مساءًلا يكلف الله نفساً الا وسعها أنا أول مرة أدخول المدونة و بصراحة حبيت أعلق علي الحكايتك و أقول لو علمتم الغيب لأخترتم الواقع فلا تحزن و الله سوف يعوضك كل خير أن شاء الله ,,,,
بس بصراحة جوز أختك بتاع أمن الدولة ده يجعل كلمنا خفيف عليهم سايبك و عمال يتكلم علي العربية حاجة غريبة مش أقادر معلقش عليها هاهاهاههاهاهاهاها أتمنا أن نكون أصدقاء
admin
السبت 26 أبريل 2008 الساعه 10:38:56 مساءًمفيش اى حد علق بكلمة يا ولاد ال …. ههههههههههههه